वालस्ट्रिटको पूर्वानुमानलाई गलत सावित गर्दै दुई अमेरिकी दिग्गज प्रविधि कम्पनी एप्पल र फेसबुकले चालू सन् २०२१ को पहिलो त्रैमासमा उच्च आम्दानी तथा मुनाफा गर्न सफल भएका छन् ।

बुधबार सार्वजनिक गरिएका पहिलो त्रैमासको वित्तीय प्रतिवेदन अनुसार पहिलो त्रैमासिक अवधिमा फेसबुकको कूल आम्दानीमा ४८ प्रतिशतले वृद्धि भएको छ । अर्थात् जनवरी देखि मार्च सम्मको अवधिमा फेसबुकले कूल २६ अर्ब १७ करोड आम्दानी गरेको छ । यसबाट फेसबुकले खूद मुनाफा साढे ९ अर्ब डलर गर्न सफल भएको छ ।त्यस्तै पछिल्लो पटक सार्वजनिक गरेका फाइभ जी आइफोनको लोकप्रियतासँगै एप्पलले सन् २०२१ का सुरूका ३ महिनामा ८९ अर्ब ६० करोड डलर आम्दानी गरेको छ । त्यसमध्ये खूद मुनाफा २३ अर्ब ६० करोड डलर रहेको छ । यो मुनाफा कुनैपनि त्रैमासिकमा एप्पलले गरेको अहिलेसम्मकै बढी मुनाफा हो ।

महामारीका बेला एप्पलका प्रडक्टहरुको विक्रिमा देखिएको ऐतिहासिक विक्रीदर निरन्तर रहेको देखिएको छ । पछिल्लो त्रैमासिक अवधिमा महंगो मूल्यको आइफोन १२ मात्र नभई महामारीका बेला घरबाटै काम गर्ने कर्मचारी तथा विद्यार्थीहरुका कारण म्याक कम्प्युटर र आइप्याण्डको बिक्रि पनि उच्च रह्यो ।

बितेको त्रैमासिकमा आइफोन बिक्रिबाट मात्र एप्पलले ४७ अर्ब ९० करोड आम्दानी गरेको छ । त्यस्तै म्याक कम्प्युटरको बिक्रिबाट उक्त ३ महिनामा एप्पलले ९।१ अर्ब आम्दानी गर्यो भने आइप्याडको बिक्रिबाट ७।८ अर्ब डलर आम्दानी ग्र्यो । यस अवधिमा म्याकको बिक्रिमा ७० प्रतिशत तथा आइप्याण्डको बिक्रिमा ७९ प्रतिशतले वृद्धि भएको एप्पलले जनाएको छ ।

एप्पलका अधिकारीहरुले भने कम्प्युटर चिप्सको विश्वव्यापी अभावले आगामी दिनमा एप्पलको आम्दानीमा उल्लेख्य प्रभाव पार्ने बताएका छन् । चिप्सको अभावले खासगरी म्याक र आइप्याडको आपूर्ति श्रृंखलामा अवरोध सिर्जना हुने उनको अनुमान छ ।

उता महामारीका बेला उपभोक्ताहरु अनलाइन सपिङतर्फ मोडिएको बेला डिजिटल विज्ञापनमा भएको तिब्र वृद्धि तथा विज्ञापन शुल्कमा पनि वृद्धि हुँदा फेसबुकलाई ठूलो फाइदा पुगेको छ । पछिल्लो रिपोर्ट अनुसार फेसबुकका दैनिक सक्रिय प्रयोगकर्ताको संख्यामा पनि १० प्रतिशतको बढोत्तरी भई २ अर्ब ८५ करोड पुगेको छ ।

वर्षको पहिलो त्रैमासिक भएको आम्दानीको वृद्धि आगामी दिनमा सुस्त हुनसक्ने अनुमान फेसबुकको छ । खासगरी एप्पलले आइफोनको प्राइभेसी सम्बन्धी नियममा गर्ने परिवर्तनले फेसबुकको विज्ञापनबाट हुने आम्दानीमा नकारात्मक असर पार्ने फेसबुकले जनाएको छ ।

एप्पलले आइफोनका एप डेभलपर्सहरुले विज्ञापनिक प्रयोजनका लागि डाटा संकलन गर्न प्रयोगकर्ताको अनुमति लिनुपर्ने गरी आफ्नो प्राइभेसी नियममा परिवर्तन गर्दैछ । यसले आफ्नो विज्ञापन व्यवसायमा असर पर्ने र प्रयोगकर्ताको पर्सनलाइज्ड विज्ञापनमा आधारित अन्य स साना कम्पनीहरुलाई समेत मार पर्ने दाबी फेसबुकले गरेको छ ।

फेसबुक संस्थापक मार्क जुकरबर्गले विज्ञापन बाहेक आगामी दिनमा खासगरी ३ वटा क्षेत्रमा फेसबुकले ध्यान केन्द्रित बताएका छन् । आगामी दिनमा अग्मेन्टेड तथा भर्चुअल रियालिटी, इ कमर्श फिचरका साथै फेसबुक प्लाटफर्ममा सर्जकहरुले समेत आम्दानी गर्ने फिचरमा फेसबुकले ध्यान केन्द्रित गर्ने जुकरबर्गले जनाएका छन् ।

एजेन्सीहरुको सहयोगमा