पथरी शनिश्चरे, जेठ ५ — मोरङको पथरी शनिश्चरे–१ स्थित पञ्चायत माध्यमिक विद्यालय ले एसईई २०८२ मा ४ जीपीए ल्याएर उत्कृष्ट सफलता हासिल गर्ने छात्रा स्वीकृति निरौला लाई नगद ५० हजार रुपैयाँसहित भव्य सम्मान गरेको छ।
विद्यालय परिसरमा आयोजित विशेष कार्यक्रममा स्वीकृतिलाई फूलमाला, अविर, खादा तथा सम्मानपत्रसहित सम्मान गरिएको हो। सामुदायिक विद्यालयबाट ४ जीपीए ल्याउन सफल भएपछि स्वीकृति अहिले नगरकै चर्चित छात्राका रूपमा परिचित बनेकी छन्।
कार्यक्रमकै अवसरमा विद्यालयका प्रधानाध्यापक अर्जुन कुमार बुढाथोकी ले अर्को ठूलो घोषणा गर्दै ३.६ जीपीएभन्दा माथि ल्याउने ८ जना विद्यार्थीलाई कक्षा ११ र १२ मा पूर्ण छात्रवृत्ति दिने जानकारी दिनुभयो। विद्यालयले विज्ञान, व्यवस्थापन, मानविकी, शिक्षा, पत्रकारिता र कानुन संकायमा अध्ययन गर्ने ती विद्यार्थीलाई करिब ७५ हजार रुपैयाँ बराबरको सुविधा उपलब्ध गराउने जनाएको छ।
प्रधानाध्यापक बुढाथोकीले मेहनत, अनुशासन र नियमित अध्ययनले असम्भव पनि सम्भव हुने बताउँदै स्वीकृतिको सफलताले अन्य विद्यार्थीलाई समेत प्रेरणा मिल्ने विश्वास व्यक्त गर्नुभयो।
सामुदायिक विद्यालयबाट यति उत्कृष्ट नतिजा आउनु गौरवको विषय भएको भन्दै विद्यालय प्रशासनले आगामी दिनमा पनि प्रतिभावान विद्यार्थीलाई प्रोत्साहन गर्ने कार्यक्रमलाई निरन्तरता दिने जनाएको छ।
वडा नम्बर–१ का वडाध्यक्ष भीमकुमार राई को अध्यक्षतामा सम्पन्न कार्यक्रममा विद्यालय व्यवस्थापन समितिका पूर्वअध्यक्ष युवराज बास्कोटा, शिक्षा शाखा प्रमुख नवीन खुलाल बुढाथोकी, शिक्षक, विद्यार्थी तथा अभिभावकहरूको उल्लेख्य उपस्थिति रहेको