डुमरलाल मेहता शुक्रबार, पौष २६, २०८१
विराटनगर । सुनसरी जिल्लाको सीमा क्षेत्रस्थित देवानगञ्ज गाउँपालिकाको १६ औं गाउँसभा अधिवेशन सम्पन्न भएको छ। गाउँपालिकाका अध्यक्ष बेचन प्रसाद मेहताको अध्यक्षतामा, उपाध्यक्ष विभा कुमारी यादव र प्रमुख प्रशासकीय अधिकृत सुधिर साफी सहितका सभा सदस्यहरूको उपस्थिति रहेको यस अधिवेशनले विभिन्न महत्त्वपूर्ण प्रस्तावहरू पारित गरेको छ।
सभामा उपाध्यक्ष विभा कुमारी यादवले कार्यपालिका निर्णय, अस्थायी/करार/ज्यालादारी कर्मचारीहरूको म्याद थप, कार्यविधि तथा मापदण्ड अनुमोदन, बेरुजु समायोजन, र आर्थिक वर्ष २०८१/८२ का बजेट संशोधनलगायतका प्रस्तावहरू पेस गरिन्। सभाले ती प्रस्तावहरू छलफल गरी पारित गर्यो।
सभामा जनप्रतिनिधिहरूले गाउँपालिकाको सामाजिक, आर्थिक, भौतिक, शैक्षिक, र सांस्कृतिक विकासका लागि पालिकाले उठाएका कदमहरूबारे धारणा राख्दै आगामी योजनाहरूको लागि सुझाव र सल्लाहहरू प्रदान गरे।
गाउँपालिका अध्यक्ष मेहताले गाउँपालिकाको प्रगति, चुनौती, र अवसरहरूको समीक्षा गर्दै समग्र विकासका लागि सबै पक्षको सहकार्य आवश्यक रहेको औंल्याए। प्रमुख प्रशासकीय अधिकृत सुधिर साफीले प्रशासनिक कामकारवाहीबारे जानकारी दिँदै सभाले पारित गरेका कार्यक्रमहरूको सफल कार्यान्वयनका लागि प्रतिबद्धता व्यक्त गरे।
उक्त गाउँसभाले नीति, कार्यक्रम, र बजेट संशोधनका प्रस्तावहरू अनुमोदन गर्दै आगामी योजनाहरू तय गर्ने निर्णय गर्यो। यसै क्रममा स्थानीय नागरिक, कर्मचारी, र जनप्रतिनिधिहरूले विभिन्न सुझाव र सल्लाह प्रस्तुत गरेका थिए।
गाउँसभाको सफलताले देवानगञ्ज गाउँपालिकाको विकास र समृद्धिमा नयाँ आशा थपेको छ।