भारतसँग सीमा जोडिएका नाकाबाट सुनसरीमा बुधबारदेखि प्रवेश निषेध गरिएको छ । जिल्ला प्रशासनले भारतीय सीमा सुरक्षा बल (एसएसबी)सँग समन्वय गरेर प्रवेश निषेध गरिएको हो । नेपाली नागरिकको हकमा कोशी गाउँपालिका–८ मा पर्ने भण्टाबारी नाकामात्र खुला गरिएको छ ।

जिल्ला प्रशासनले भण्टाबारी नाकाबाट प्रवेश गर्ने नेपाली नागरिकका लागि हेल्प डेस्क राखिएको प्रमुख जिल्ला अधिकारी उमेशकुमार ढकालले बताए । उनले भने,‘पछिल्लो दुई सातायता झन् तीव्र भएको कोरोना महामारीको दोस्रो लहरको जोखिम बढेसँगै खुला सिमानालाई बन्द गर्न जनपद र सशस्त्र प्रहरीको संख्या बढाइएको छ ।’

प्रजिअ ढकालकाअनुसार खुला सीमा नाकाका कारण मानिसको आवागमन बढ्दा कोरोना संक्रमणको दर वृद्धि भएको छ । उनले भने, ‘भारतसँग सुनसरीको कोशी ब्यारेजदेखि केसल्या खोलासम्ममा ६२ किलोमिटर सिमाना खुला छ । त्यस सीमा क्षेत्रमा सशस्त्रका १० वटा बीओपी (बोर्डर आउट पोष्ट) रहेका छन् ।’

खुला सिमाना भएकैले जसलाई जतिखेर आउन मन लागे आउने र जान मन लागे जाने भएकाले पहिलेको भन्दा कडा निगरानी गर्न थालिएको प्रजिअ ढकालले बताए । उनले भने, ‘भारतका विभिन्न प्रान्तमा पनि कोरोना संक्रमण बढिरहेको र नेपालसँगको खुला सिमानाबाटै छिर्नेहरुले पछिल्लो समयमा कोरोना संक्रमण बढाएको देखिएकाले सिमा बन्द गरिएको हो ।’

सीमा क्षेत्रमा मानिसको आवागमन रोक्न ६ सय बढीको संख्यामा सुरक्षाकर्मी परिचालन गरिएको छ । धरान, इटहरी लगायतका क्षेत्रमा रहेको सशस्त्र र जनपदका जनशक्तिलाई व्यवस्थापन गरी सीमा क्षेत्रमा परिचालित गरिएको उनले बताए ।

सीमा क्षेत्रमा ९ वटाको संख्यामा फरवार्ड पोष्ट सञ्चालनमा ल्याएको छ । ती पोष्टमा आवश्यक्ता अनुसारको सुरक्षाकर्मी थप गर्दै लैजाने बताइएको छ । खुला सिमानामा निगरानी राख्नका लागि पैदल गस्तीका साथै साइकल, मोटरसाइकल र गाडीबाट हुने गस्ती बढाइएको छ भने रातिको समयमा समेत निगरानी र सर्तकता बढाइएको जनाएको छ ।

यसैबीच स्थानीय तहसँग समन्वय गरेर कोरोना संक्रमितहरुका लागि सुनसरीका १२ स्थानीय तहहरुमा आइसोलेसन सेन्टर सञ्चालनमा ल्याउने निर्णय भएको छ । निर्णयअनुसार धरान, इटहरी, इनरुवाले आफ्नै आइसोलेसन सेन्टर सञ्चालनमा ल्याउने छन् भने कोशी र भोक्रा, रामधुनी र बराहक्षेत्र नगरपालिका, बर्जु–देवानगन्ज र गढी गाउँपालिकाले एक आपसमा मिलेर आइसोलेशन सेन्टर सञ्चालन गर्ने निर्णय भएको प्रजिअ ढकालले बताए ।

श्रोत: ई कान्तिपुर