विराटनगर । लम्पी स्किन रोगको प्रकोपका कारण कोशी प्रदेशमा ६ हजार ६१४ वटा गाई– गोरु र ७२ वटा राँगा भैँसी मरेका छन् । कोशी प्रदेशको १४ जिल्लामा यो रोगबाट ६ हजार ६१४ वटा गाई– गोरु र ७२ वटा राँगा भैँसी मरेका हुन् ।

कोशी प्रदेश पशुपन्छी तथा मत्स्यविकास निर्देशनालय विराटनगर निमित्त निर्देशक डाक्टर पशुपति ढुंगानाका अनुसार कोशी प्रदेशमा हालसम्म २ लाख ३७ हजार ४२१ वटा पशुचौपाया प्रभावित भएका छन् । प्रदेशमा हालसम्म १ लाख ३२ हजार ३४९ वटा पशुचौपायालाई खोप लगाइएको छ ।

ढुंगानाका अनुसार पहाडी जिल्लामा लम्पी स्किन रोगको प्रकोप नियन्त्रण भएको छ ।

झापा, मोरङ र सुनसरीमा भने नियन्त्रण हुन अझै सकेको छैन । तराईको झापा, मोरङ र सुनसरीमा रोग सङ्क्रमण र प्रभावित हुने पशुहरूको सङ्ख्या पछिल्लो समय बढेको उनले बताए ।

उनले लम्पीस्किन रोग नियन्त्रणको लागि खोपको अभाव भने टरेको बताएका छन् । ढुंगानाले अहिले भने खोपको अभाव नभएको बताए ।

‘एउटा गाई बिरामी देखियो भने एउटा खोप किन्छु भन्ने अवस्था चाहिँ छैन, किसानलाई अलिक समस्या यही छ,’ उनले भने, ‘एक भाइल खरिद गर्दा २५ वटा खोप किन्नुपर्ने बाध्यता छ । एउटा किसानले एकैपटक यति किनेर खेर फाल्नुपर्ने अवस्था हुन्छ । एकैपटक २५ जना पशुका लागि खरिद गर्नुपर्ने हुन्छ । त्यसका लागि किसानहरू मिलेर मात्रै सम्भव छ ।’ ढुंगानाका अनुसार एउटा खोपको बजार मूल्य १५० रुपैयाँ रहेको छ ।

एक महिना अगाडिसम्म सबैभन्दा धेरै प्रभावित हुने जिल्ला इलाम थियो । तर, अहिले पाँचथर धेरै प्रभावित देखिएको छ । पाँचथरमा हालसम्म ३४ हजार १०९ वटा गाईभैंसीमा यो रोग देखिएको छ ।

झापामा २० हजार ४२७, इलाममा १८ हजार ८०९, ताप्लेजुङमा ९ हजार ९९९, मोरङमा २२ हजार ९५०, उदयपुरमा २१ हजार ८१९, खोटाङमा १३ हजार ९५४, ओखलढुंगामा ८ हजार २८९, सोलुखुम्बुमा ७ सय १६, धनकुटामा २२ हजार ५३६, तेह्रथुममा १८ हजार ७१, सङ्खुवासभामा १४ हजार ४०७, भोजपुरमा ७ हजार ४३९ र सुनसरीमा २२ हजार ८९६ वटा पशु प्रभावित भएका छन् । सबैभन्दा धेरै मृत्यु हुने पशु भने इलाममा रहेका छन् । इलाममा हालसम्म १ हजार ३८२ वटा पशुको मृत्यु भएको छ ।

एक महिना अगाडि प्रदेशभरमा १ लाख ५९ हजार ४२९ वटा पशु प्रभावित भएका थिए ।