विराटनगर । सुनसरीका सुरक्षा अधिकारीहरुले सीमावर्ती क्षेत्र र सीमा स्तम्भको अनुगमन तथा निरीक्षण गरेको छ । सीमावर्ती क्षेत्रको बर्जु र देवानगञ्ज गाउँपालिकाको सीमा स्तम्भको अनुगमन तथा निरीक्षण गरिएको हो । शुक्रबार मोरंगको सीमा केशल्या खोला र नेपाल भारतसीमा अमडुवादेखी देवानगञ्जको कौवाखोचसम्मको क्षेत्रमा नेपाल–भारत सीमा स्तम्भको अनुगमन गरिएको सुनसरीका प्रमुख जिल्ला अधिकारी हुमकला पाण्डेले जानकारी दिनुभयो ।
तीन वटै सुरक्षा अधिकारीको साथ सीमा स्तम्भहरुको अवस्था, सिमावर्ती क्षेत्रबाट हुने अवैध चोरी निकासी, लागुऔषध ओसारपसार लगायतका अपराधहरु हुन नदिन अनुगमन गरिएको प्रमुख जिल्ला अधिकारी पाण्डेले जानकारी दिनुभयो ।
नियमित अनुगमनको क्रममा यो वर्ष पहिलो पटक बर्जु गाउँपालिका ३ को अमडुवा, ४ को बेरिया र देवानगञ्ज गाउँपालिका ५ को साहेवगञ्ज, ३ र ४ को कौवाखोच कप्तानगञ्ज सीमा स्तम्भको अनुगमन तथा निरीक्षण गरिएको प्रजिअ पाण्डेले बताउनुभयो ।
नेपाल–भारत सीमा स्तम्भको अनुगमन गर्दै सीमामा कडाईका साथ शान्तीसुरक्षा मजबुत राख्न नेपाल र सशस्त्र प्रहरी कर्मचारीहरुलाई निर्देशन दिनुभयो । प्रजिअ पाण्डेले सुनसरीको बर्जु गाउँपालिका ३ को अमडुवा स्थित पुर्वी पहिलो जंगे सीमा सीमास्तम्भ नं। १८२ पीपी ७१ देखी देवानगञ्ज गाउँपालिका ३ पाचोसिम्बर कप्तानगञ्जको सानो सीमा सीमास्तम्भ नं. १८९ पीपी ७१ सम्मको अनुगमन गरिएको बताउनुभयो । उहाँका अनुसार सीमा नाकामा हाल नयाँ कुनै पनि समस्या नरहेको अनुगमनको क्रममा पाइएको छ ।

सीमा अनुगमनमा प्रजिअ पाण्डेसहित सहायक प्रमुख जिल्ला अधिकारी माधव प्रसाद ढुंगाना, प्रहरी उपरीक्षक प्रभुप्रसाद ढकाल, सशस्त्र प्रहरी उपरीक्षक लकेशकुमार तुम्वाहाङ्फे, सशस्त्र प्रहरी नायव उपरीक्षक तथा निरीक्षकहरुको सहभागिता रहेको थियो । साथै सिमावर्ती क्षेत्रमा रहेका प्रहरी युनिटहरुमा कार्यरत प्रहरी कर्मचारीहरुलाई कार्य सम्पादनको क्रममा सुरक्षा मापदण्डको पालना गरी उच्च मनोवलका साथ प्रभावकारी भुमिका निर्वाह गर्न समेत उत्प्रेरित गर्नुभएको थियो ।
प्रजिअ पाण्डेलाई कप्तानगञ्ज वेस क्याम्पले सेवा क्षेत्र र नक्साको बारेमा जानकारी गराएको थियो ।