विराटनगर । सुनसरीको देवानगन्ज गाउँपालिका पालिकाभित्रका किसानलाई हौसला थप्दै सिँचाइका लागि डिप टुवेल बनाइदिएको छ।

भुमिगत जलश्रोत तथा सिचाइ विकास डिभिजन विराटनगरको सहयोग र सगुन जल उपभोक्त समिति देजानगञ्जको आयोजनामा देवानगञ्ज वडा नम्बर २ मा दुईवटा डिप टुवेल बनाइदिएको हो। दुई वर्ष अगाडिदेखि काम थालिएको डिप टुवेलको काम केही दिनअघि मात्र सम्पन्न भएको थियो।

शुक्रबार नयाँ वर्ष २०८० को अवसर पारेर गाउँपालिका अध्यक्ष बेचनप्रसाद मेहताले दुइटै डिप टुवेलको उद्घाटन गरे।

गाउँपालिकाका प्रमुख प्रशासकीय अधिकृत रामराज पौडेल, वडा नम्बर २ का अध्यक्ष जगनारायण मेहतासहित पालिकाकाका समस्त वडाध्यक्ष, जनप्रतिनिधि,  २ नम्बर वडाको कर्मचारी र किसानहरूको उपस्तिथिमा डिप टुवेलको उद्घाटन भएको हो।

उद्घाटनपछि बोल्दै अध्यक्ष मेहताले किसानको सिँचाइको सुविधाका लागि नै डिप टुवेल बनाइएको जानकारी दिए। पालिकाभित्रका ९० प्रतिशत स्थानीय कृषि पेशामा आधारित रहेको जनाउँदै उनले भने, यो त सुरुआत हो, किसानलाई हौसला बढाउने। अबको चार वर्षभित्र कृषकका हर समस्या समाधान हुने छन्।

छिमेकी मुलुक भारतको पञ्जाब–हरियाणामा हुने आधुनिक कृषि प्रणाली आत्मसात् गर्दै कृषि कर्ममा मानिसहरूलाई आत्मनिर्भर बनाउने योजनामा आफू रहेको पनि उनको भनाइ छ। पालिकाका विभिन्न स्थानमा डिप बोरिङ गरेर किसानलाई कृषिकर्ममा थप सहज बनाउने उनले बताए।

यस्तै, गाउँपालिकाका प्रमुख प्रशासकीय अधिकृत पौडेलले कृषिमा आत्मनिर्भर रहेका देवानगन्जका स्थानीयलाई थप उत्साह थप्ने काममा आफूहरू खटिने उल्लेख गरे।

वडाध्यक्ष मेहताले गाउँपालिका अध्यक्ष किसानका समस्यालाई लिएर गम्भीर रहेको बताउँदै भने, उहाँले यसअघि नै भन्नुभएको थियो, पञ्जाब -हरियाणाको प्रविधि भित्र्याएर किसानलाई सहज बनाउँछु भनेर। हो, त्यही गतिमा काम भइरहेको छ। बोरिङ, मोर्टर राख्ने घर र पाइपलाइन बनाएर सिँचाइको काम थालिएको उनको भनाइ छ।

स्थानीय किसान सदानन्द मेहताले सिँचाइको समस्यासँग जुधिरहेका किसान गाउँपालिकाको सहयोगले उत्साहित भएको बताए। स्थानीय किसान विशेश्वर मेहता र विनोद मेहता लगायतले पनि पालिकाले गरेको सहयोगले आफूहरूलाई हौसला प्रदान गरेको सुनाए।