डुमरलाल मेहता मंगलबार, फाल्गुण ०९, २०७९
विराटनगर । सुनसरीको बर्जु गाउँपालिकाका शिक्षकहरुले ५ महिनादेखी तलव खान नपाएको आक्रोसमा विद्यालयको पठन पाठन बहिस्कार गरेका छन । शिक्षण सिकाई अनुदान कार्यक्रम अन्र्तगत नियुक्ती भएका आधा दर्जन शिक्षहरुले परिक्षाको मुखमा आएर पठन पाठन बहिस्कार गरेका हुन ।
पहिलो त्रैमासिकको तलव दशै अगावै बर्जु गाउँपालिकाले स्रोत भर्ना गरि उपलब्ध गराएर थामथुम पारेको थियो । शिक्षा तथा प्रविद्यि मन्त्रालयको अनुदान शाखा भक्तपुरले तलव निकासा चाडै गरेर पठाउने आश्वासन दिईरहेको तर निकास नगरेकोले शिक्षकहरु आन्दोलित भएका हुन ।
पाँच महिनादेखी तलव पाउन नसकेका शिक्षकहरुले जीविकोपार्जन गर्न अत्यन्तै कस्टर बनेको र आफूहरु बाध्य भएर विद्यालय बहिस्कार गर्नु परेको बताए ।
बर्जु गाउँपालिका वडा न ४ मा संचालित जनकल्याण माध्यमिक विद्यालय , सोही पालिका वडा न ३ को श्री नेपाल राष्ट्रिय शिब माध्यमिक विद्यालय र सार्वजनिक आधारभूत निम्न माध्यमिक विद्यालयका शिक्षकहरुको तलव ५ महिनादेखी आएको छैन ।
यसरी शिक्षहरुले एक सातादेखी विद्यालय जान छाडेपछि परिक्षाको मुखमा विद्यार्थीको पठन पाठन प्रभावित भएको छ । बर्जू गाउपालिकाले पिडित शिक्षकहरुलाई बोलाएर पून विद्यालय फर्कन आग्रह गरेको छ । तर शिक्षकहरु तलव नपाई विद्यालय जाने अवस्था नरहेको बताउदै आएका छन ।
बर्जू गाउपालिकाका अध्यक्ष जीबछ रायले छिटो तलव निकासा गर्न शिक्षा मन्त्रालयको अनुदान शाखामा दवाव दिईरहेको र अझै निकासमा विलम्ब भए गाउँपालिका सहमतिमा जुटेर समस्याको समाधान गर्ने बताए ।
उत्ता पिडित शिक्षकहरुले गाउँपालिका शिक्षा शाखाको हेलचर्काईका कारण पिडित हुँदै आएको आरोप लगाए ।
