विराटनगर । शिक्षा क्षेत्रमा बजेट तथा कार्यक्रम लगायतका विषयमा अन्तरक्रिया तथा राय सुझाव संकलन कार्यक्रम सम्पन्न भएको छ । मंगलवार शिक्षा विज्ञान तथा प्रविधि मन्त्रालयले आयोजनामा शिक्षा विकास तथा समन्वय इकाइ मोरङको सभाहलमा सो कार्यक्रम सम्पन्न भएको हो । शिक्षा क्षेत्रमा बेरुजुको अवस्था डरलाग्दो देखिएको भन्दै त्यसलाई घटाउने तर्फ विशेष ध्यान दिन शिक्षा मन्त्रालयका उपसचिव प्रकाश सापकोटाले बताएको छ। विराटनगरमा शिक्षा क्षेत्रमा बजेट कार्यान्वयन सुझाव छलफल तथा बेरुजु सम्बन्धी एकदिने कार्यशाला गोष्ठीमा उहाँले त्यस्तो बताउनुभयो ।

कार्यशालामा शिक्षा विकास तथा समन्वय इकाइ मोरङका प्रमुख टंकप्रसाद गौतमले बेरुजु भएका विद्यालयहरूका प्रधानाध्यापक शिक्षकको सरुवा रोक्का गर्ने, अवकाशको पेन्सनपट्टा रोक्का गर्ने चेतावनी पनि दिनुभयो। कार्यक्रमका प्रमुख अतिथि प्रकाश सापकोटाले शिक्षकहरूलाई मासिकरुपमा तलब निकासा गर्न पालिकाका शिक्षा अधिकृतहरूलाई निर्देशन दिनुभयो। उहाँले श्रम शोषण गर्न नपाइने भन्दै शिक्षकको तलबलाई ताल्चा लगाएर राख्ने प्रवृत्ति अन्त्य गर्न निर्देशन दिनुभयो ।

कार्यक्रममा सामाजिक विकास मन्त्रालय कोशी प्रदेशका उपसचिव फडिन्द्र खत्री, राष्ट्रिय परीक्षा बोर्ड कोशी प्रदेश प्रमुख उपसचिव जीवन गड्तौला शिक्षा मन्त्रालयका शाखा अधिकृत शिवराम पोखरेल, शिक्षा अधिकृतद्वय शिवप्रसाद घिमिरे, प्रकाश गुरुडलगायतको सहभागिता थियो ।
कार्यक्रममा गोष्ठीमा मोरडका १७ वटै पालिका अन्तर्गतका शिक्षा शाखा प्रमुखहरु सहभागी कार्यक्रममा थियो।