छठी माताको आराधनासँगै सामाजिक सेवाको सन्देश, ९० जना व्रतालु महिलालाई साडी वितरण
मोरङ । सूर्य उपासनाको महापर्व छठको धार्मिक, सांस्कृतिक तथा सामाजिक महत्वलाई आत्मसात् गर्दै मोरङको कटहरी गाउँपालिका–१, जमटोकीमा ९० जना विपन्न व्रतालु महिलालाई साडी वितरण गरिएको छ। छठ पर्वको अवसर पारेर श्री हरि सत्संग समिति नेपालले आयोजना गरेको कार्यक्रममा आर्थिक रूपमा विपन्न तथा असहाय अवस्थाका व्रतालु महिलालाई सम्मानस्वरूप साडी वितरण गरिएको हो।
धार्मिक आस्था, सामाजिक सद्भाव र मानवीय सेवाको भावनालाई जोड्दै आयोजना गरिएको उक्त कार्यक्रमले छठ पर्व केवल पूजा–आराधनामा सीमित नरही एकअर्कालाई सहयोग गर्ने, दुःखसुख बाँड्ने र समाजमा आपसी सद्भाव कायम गर्ने पर्वसमेत भएको सन्देश दिएको छ।
कार्यक्रममा समाजसेवी एवं धार्मिक व्यक्तित्व डा. शिवशंकर साहले उपलब्ध गराउनुभएको साडी कटहरी गाउँपालिका–१ जमटोकीका ९० जना व्रतालु महिलालाई वितरण गरिएको थियो। आर्थिक अवस्था कमजोर भएका महिलाले पनि सम्मानपूर्वक छठ पर्व मनाउन सकून् र पर्वका अवसरमा आवश्यक सामग्री जुटाउन सहज होस् भन्ने उद्देश्यले साडी वितरण गरिएको आयोजकले जनाएको छ। साडी प्राप्त गरेपछि व्रतालु महिलाहरूले खुसी व्यक्त गर्दै सहयोगी दाता डा. साह तथा श्री हरि सत्संग समिति नेपालप्रति आभार प्रकट गरेका थिए। पर्वका बेला आफूहरूको अवस्थालाई बुझेर सम्मान र सहयोग गरेको भन्दै उनीहरूले यस्ता मानवीय सेवाका कार्यक्रमले विपन्न समुदायमा उत्साह र आत्मविश्वास बढाउने बताएका थिए।
कार्यक्रममा श्री हरि सत्संग समिति नेपालका अध्यक्ष भिखम चन्द सरलले धार्मिक आस्था र सामाजिक सेवाबीच अन्योन्याश्रित सम्बन्ध रहेको उल्लेख गर्दै समाजका विपन्न, असहाय र आवश्यकतामा परेका व्यक्तिलाई सहयोग गर्नु नै धर्मको महत्वपूर्ण पक्ष भएको बताए। धार्मिक तथा सांस्कृतिक पर्वलाई सामाजिक उत्तरदायित्वसँग जोड्न सके त्यसले समाजमा सकारात्मक परिवर्तन ल्याउन सक्ने उनको भनाइ थियो।
त्यसैगरी कार्यक्रममा उद्घोषण गर्दै ग्राम संगठनका अध्यक्ष विद्यानन्द माझीले हिन्दु धर्म, संस्कृति र परम्पराको संरक्षण, संवर्द्धन तथा प्रचारप्रसारमा सबै एकजुट भएर लाग्नुपर्नेमा जोड दिए। उनले हिन्दु धर्मको मौलिकता, धार्मिक पहिचान र सांस्कृतिक परम्परालाई नयाँ पुस्तासम्म पुर्‍याउनु आजको आवश्यकता भएको बताए।कार्यक्रममा नगर संगठनका अध्यक्ष धनश्याम कावरा, सम्भाग अध्यक्ष महेश स्वर्णकार, पत्रकार राजेश शर्मालगायत विभिन्न धार्मिक तथा सामाजिक व्यक्तित्वहरूको उपस्थिति रहेको थियो। उपस्थित अतिथिहरूले छठ पर्वको महत्वबारे चर्चा गर्दै धार्मिक आस्थालाई सामाजिक सेवासँग जोडेर गरिने यस्ता कार्यक्रमले समुदायबीच आपसी सम्बन्ध, सहयोग र सद्भावलाई थप बलियो बनाउने बताए।
छठ पर्व हिन्दु धर्मावलम्बीहरूको महत्वपूर्ण आस्था र निष्ठासँग जोडिएको पर्व हो। यस पर्वमा सूर्यदेव र छठी माताको विधिपूर्वक पूजा–आराधना गरिन्छ। प्रकृति, जल, प्रकाश र जीवनको आधार सूर्यप्रति कृतज्ञता प्रकट गर्ने पर्वका रूपमा छठको विशिष्ट धार्मिक तथा सांस्कृतिक महत्व रहँदै आएको छ।
धार्मिक मान्यताअनुसार छठी माताको आराधना गर्दा परिवारमा सुख, शान्ति, समृद्धि प्राप्त हुने, सन्तानको दीर्घायु तथा उत्तरोत्तर प्रगति हुने र मनोकामना पूरा हुने विश्वास गरिन्छ। यही विश्वासका साथ व्रतालु महिलाहरूले कठोर नियम, निष्ठा र पवित्रता अपनाउँदै चार दिनसम्म छठको व्रत बस्ने परम्परा छ।
नहाय–खायबाट सुरु हुने छठ पर्वको दोस्रो दिन खरना गरिन्छ। तेस्रो दिन अस्ताउँदो सूर्यलाई अर्घ्य अर्पण गरिन्छ भने अन्तिम दिन बिहान उदाउँदो सूर्यलाई अर्घ्य दिएपछि व्रत समापन गरिन्छ। यस क्रममा ठेकुवा, भुसुवा, फलफूल, उखु, नरिवललगायत प्रसाद सामग्री बाँसका सुप र नाङ्लोमा सजाएर नदी, पोखरी तथा जलाशयका किनारमा सामूहिक रूपमा पूजा गर्ने चलन छ।छठको अर्को महत्वपूर्ण पक्ष सामाजिक समानता, एकता र सद्भाव हो। जातजाति, भाषा, वर्ग र समुदायबीचको विभेदभन्दा माथि उठेर सबैले एउटै घाटमा भेला भई सूर्यदेवको आराधना गर्ने यस पर्वले आपसी मेलमिलाप र सहअस्तित्वको सुन्दर सन्देश प्रवाह गर्छ। यस पर्वमा व्यक्तिगत स्वार्थभन्दा सामूहिक सहभागिता, सहयोग र सामाजिक एकताको भावना बढी महत्वपूर्ण मानिन्छ।
यही मर्मलाई व्यवहारमा उतार्दै श्री हरि सत्संग समिति नेपालले गरेको साडी वितरण कार्यक्रमलाई धार्मिक आस्था र मानवीय सेवाको उदाहरणका रूपमा हेरिएको छ। धर्म भनेको मन्दिरमा पूजा गर्नु वा चाडपर्वमा विधि पूरा गर्नु मात्र नभई दुःखी, असहाय र विपन्न व्यक्तिको पीडामा साथ दिनु पनि हो भन्ने सन्देश कार्यक्रमले दिएको छ।
छठी माताप्रतिको श्रद्धा, सूर्यदेवप्रतिको आस्था र प्रकृतिप्रतिको सम्मानसँगै मानव सेवाको भावनालाई जोडेर गरिएको यस कार्यक्रमले समाजमा सहयोग, प्रेम, सद्भाव र मानवीयताको भावना विस्तार गर्न सकारात्मक योगदान पुर्‍याउने अपेक्षा गरिएको छ।