नेपालगञ्ज पौडी प्रतियोगितामा एभरेस्ट स्कुल विराटनगरका विद्यार्थीको शानदार सफलता, ६ पदक जित्न सफ
विराटनगर । नेपालगञ्जमा सम्पन्न ‘नबिल बैंक तेस्रो नेपालगञ्ज अन्तर्राष्ट्रिय पौडी प्रतियोगिता’ मा कोशी प्रदेशको प्रतिनिधित्व गर्दै सहभागी एभरेस्ट सेकेण्डरी स्कुल विराटनगरका विद्यार्थीले उत्कृष्ट सफलता हासिल गरेका छन्।
प्रतियोगितामा विद्यालयका दुई विद्यार्थीले विभिन्न विधामा प्रतिस्पर्धा गर्दै कुल ६ पदक जित्न सफल भएका हुन्।
नेपाल पौडी संघको प्राविधिक सहयोगमा नेपालगञ्ज स्वीमिङ क्लबले आयोजना गरेको प्रतियोगितामा कक्षा ७ मा अध्ययनरत पुरव तिम्सिना र आरध्या पाण्डेले उत्कृष्ट प्रदर्शन गरेका थिए।
प्रतियोगितामा पुरव तिम्सिनाले १०० मिटर र ५० मिटर ब्रेस्टस्ट्रोक विधामा दोस्रो स्थान हासिल गर्दै दुई रजत पदक जितेका छन्। त्यसैगरी, आरध्या पाण्डेले १०० मिटर फ्रिस्टाइल, ५० मिटर ब्याकस्ट्रोक, ५० मिटर बटरफ्लाइ र ५० मिटर फ्रिस्टाइल विधामा तेस्रो स्थान हासिल गर्दै चार कास्य पदक जितेकी छन्।
प्रतियोगितामा नेपालका सातवटै प्रदेशका साथै भारतको नयाँदिल्ली र लखनऊलगायत विभिन्न स्थानबाट करिब १५० खेलाडीको सहभागिता रहेको थियो।
विद्यार्थीहरूको मेहनत, अनुशासन र दृढ संकल्पले विद्यालय परिवारलाई गौरवान्वित बनाएको विद्यालयका प्रिन्सिपल टीकाराम पुरीले बताए। उनीहरूको सफलताले विद्यालयको खेलकुद क्षेत्रको पहिचान थप उँचो बनाउनुका साथै अन्य विद्यार्थीलाई पनि पौडी खेलमा अघि बढ्न प्रेरणा मिल्ने विश्वास उनले व्यक्त गरे।
प्रतियोगितामा विद्यार्थीहरूले हासिल गरेको यस सफलताले एभरेस्ट सेकेण्डरी स्कुल विराटनगरको खेलकुद क्षेत्रमा उत्कृष्ट पहिचान स्थापित गर्न थप योगदान पुर्‍याएको छ।