विराटनगर । जिल्ला सहकारी संघ लिमिटेड मोरङद्वारा विराटनगरमा आयोजित एक दिवसीय “महिला सहकारी गोष्ठी, २०८२” भव्य रूपमा सम्पन्न भएको छ । गोष्ठीमा सहभागी सयौं महिला सहकारीकर्मीहरूले सहकारी अभियानलाई सुदृढ, पारदर्शी र दिगो बनाउने प्रतिबद्धतासहित “विराटनगर घोषणापत्र” सार्वजनिक गरेका छन् ।
घोषणापत्रमार्फत सहकारीको मूल मूल्य, मान्यता र सिद्धान्तलाई आत्मसात गर्दै गुणस्तरीय सहकारी अभियान निर्माण गर्ने अठोट व्यक्त गरिएको छ । सहभागीहरूले सहकारी क्षेत्रमा लैङ्गिक समानता सुनिश्चित गर्दै महिलाको अर्थपूर्ण सहभागिता बढाउने, निर्णय तहमा पहुँच विस्तार गर्ने र क्षमता विकासका कार्यक्रम सञ्चालन गर्ने प्रतिबद्धता जनाएका छ।
कार्यक्रममा सहकारी क्षेत्रप्रति फैलिएको नकारात्मक छवि हटाउन सदस्य शिक्षा, तालिम र जनचेतनामूलक अभियान सञ्चालन गर्नुपर्ने आवश्यकता औंल्याइएको छ । साथै, “मर्यादित सहकारी, समुन्नत समाज” नारालाई व्यवहारमा उतार्ने प्रतिवद्धता दोहोर्याइएको छ ।
⚖️ सुशासन र नेतृत्वमा जोड
घोषणापत्रमा सहकारीमा सुशासन, प्रभावकारी सेवा प्रवाह, वैकल्पिक नेतृत्व विकास र नेतृत्व हस्तान्तरणलाई सहज बनाउने विषयलाई प्राथमिकतामा राखिएको छ । साथै, महिलाको गुणात्मक सहभागिता सुनिश्चित गर्न सरकारसँग माग गरिएको छ ।
सहकारी संस्थाको वित्तीय सुदृढीकरण, बचतकर्ताको हित संरक्षण र भ्रामक गतिविधिमाथि कडाइ गर्न सरकारसँग आग्रह गरिएको छ । समस्याग्रस्त सहकारीका बचतकर्तालाई भुक्तानीका लागि स्रोत व्यवस्थापन गर्नुपर्ने माग पनि उठाइएको छ ।कोशी प्रदेशका उद्योग, कृषि तथा सहकारी मन्त्री इस्राईल मन्सुरीले प्रदेश सरकारले महिला सशक्तीकरणमा निरन्तर काम गरिरहेको बताए । उनले महिला सहकारीकर्मीहरूको सशक्तीकरणका लागि आवश्यक बजेट विनियोजन गर्ने प्रतिबद्धता व्यक्त गरे ।

राष्ट्रिय सहकारी महासंघका कार्यवाहक अध्यक्ष रमेश पोखरेलले सहकारी क्षेत्रमा महिलाको भूमिका अर्थपूर्ण र प्रभावकारी रहेको उल्लेख गरे । आगामी जेठमा महिला सहकारी सम्मेलन आयोजना गरिने जानकारी दिँदै उनले महिलाको योगदानबारे व्यापक छलफल हुने बताए ।
प्रदेश सहकारी रजिष्ट्रार भुपेन्द्र खनालले सहकारीमा महिलाको संख्या बढी भए पनि निर्णय तहमा प्रभाव कत्तिको छ भन्ने प्रश्न अझै बाँकी रहेको बताए । उनले ३३% सहभागिता व्यवस्था मात्र पर्याप्त नभई व्यवहारिक नेतृत्व आवश्यक रहेको औंल्याए ।
गोष्ठीमा तीन सयभन्दा बढी महिला सहकारीकर्मीहरूको सक्रिय सहभागिता रहेको थियो । कार्यक्रम आयोजक समितिकी संयोजक हिमा मैनालीको अध्यक्षतामा सम्पन्न कार्यक्रममा विभिन्न विषयमा कार्यपत्र प्रस्तुत गरिएको थियो ।
राष्ट्रिय सहकारी महासंघकी पूर्व महाप्रबन्धक चित्रा कुमारी थाम्सुहाङ्गले “लैंगिक समानता र सामाजिक रूपान्तरणमा सहकारी” विषयमा कार्यपत्र प्रस्तुत गरिन् भने सहकारी अभियन्ता लक्ष्मीप्रसाद उप्रेतीले “सहकारीमा महिला नेतृत्व र सुशासन” विषयमा प्रस्तुति दिएका थिए ।
महिला सहकारीकर्मीहरूको यो भेला केवल गोष्ठीमा सीमित नभई नीति, नेतृत्व र व्यवहार परिवर्तनको स्पष्ट सन्देशका रूपमा देखिएको छ । “विराटनगर घोषणापत्र” अब सहकारी क्षेत्र सुधारको मार्गचित्र बन्ने अपेक्षा गरिएको छ ।