विराटनगर । नेपाली कांग्रेस का वरिष्ठ नेता डा. शेखर कोइरालाले संविधानको रक्षा, संसदीय सर्वोच्चताको स्थापना र लोकतान्त्रिक मूल्यमान्यताको संरक्षणका लागि आफू प्रतिनिधिसभा सदस्य निर्वाचनमा होमिएको बताएका छन्। मोरङ क्षेत्र नम्बर ६ अन्तर्गत विराटनगर–५ जामुनगाछीमा मंगलबार आयोजित चुनावी घरदैलो तथा कोणसभालाई सम्बोधन गर्दै उनले वर्तमान राजनीतिक अवस्थालाई गम्भीर भन्दै निर्वाचनलाई ‘सामान्य चुनाव’ मात्र नभई जनमत सङ्ग्रहसरह भएको टिप्पणी गरे।
“संसद्को सर्वोच्चता कमजोर भयो भने कांग्रेस पनि कम्युनिस्ट बन्छ”
आम सर्वसाधारणसँगको भेटघाटका क्रममा उनले संसदको भूमिका र संवैधानिक व्यवस्थामाथि जोड दिँदै भने,
“संसद्को सर्वोच्चताका लागि मलाई तपाईंहरूले संसदमा पठाउनुहुनेछ। संसदमा कांग्रेसको निर्णायक उपस्थिति र सर्वोच्चता नहुँदा भोलि कांग्रेस पनि कम्युनिस्टजस्तै बन्ने अवस्था आउन सक्छ। त्यो आम विराटनगरवासीले चाहेको अवस्था होइन।”
उनका अनुसार लोकतन्त्रको मूल आधार नै संसदीय सर्वोच्चता हो। यदि संसद कमजोर बनाइयो भने कार्यपालिका हाबी हुने, शक्तिको सन्तुलन बिग्रने र संविधानको मर्म कमजोर हुने खतरा रहने उनको भनाइ थियो।
नयाँ दल र अफवाहबारे टिप्पणी
कोइरालाले पछिल्लो समय उदाएका नयाँ दलप्रति लक्षित गर्दै पुराना दलविरुद्ध योजनाबद्ध रूपमा नकारात्मक भाष्य निर्माण गरिएको दाबी गरे। “नयाँ पार्टीले पुराना दलका विषयमा अफवाह फैलाएको छ। ती अफवाह चिर्न आवश्यक छ। जनतालाई भ्रममा पारेर राजनीति गर्नु उचित होइन,” उनले भने।
‘जेनजी विद्रोह’ पछि मुलुक राजनीतिक अस्थिरतातर्फ धकेलिएको अनुभूति भएको उल्लेख गर्दै उनले २०८४ सालमा हुने भनिएको निर्वाचन दुई वर्षअघि आउनु आफैंमा असामान्य परिस्थिति भएको बताए। “यसकारण यो निर्वाचन केवल प्रतिनिधि छान्ने प्रक्रिया होइन, जनताको स्पष्ट अभिमत दिने अवसर हो,” उनले जोड दिए।
विदेशमा रहेका नेपालीलाई सन्देश
निर्वाचन र मतदाताको निर्णयमा विदेशमा रहेका नेपालीले सामाजिक सञ्जालमार्फत प्रभाव पार्न खोजेको प्रसंग उल्लेख गर्दै उनले यथार्थ बुझ्न आग्रह गरे।
“विदेशमा बस्नु भएकाहरूलाई यहाँको अवस्था बुझ्न अनुरोध गर्छु। घरमा समस्या पर्दा आमाबुवालाई यहाँ हामीले नै सहयोग गर्ने हो। हाम्रा साथीहरू टोल–टोलमा खटिनुभएको छ,” उनले भने।
उनले भावनामा बगेर होइन, वस्तुगत विश्लेषण गरेर मतदान गर्न आग्रह गरे।
विराटनगर महानगरको उपलब्धि
विराटनगर महानगरपालिकाले वित्तीय आयोगको मूल्याङ्कनमा पहिलो स्थान हासिल गरेको विषयलाई उल्लेख गर्दै उनले यसलाई महानगरवासीको साझा उपलब्धि बताए।
“विराटनगरले वित्तीय सुशासन कायम राखेको छ। पारदर्शिता र जवाफदेहितामा अघि बढेको छ। यसमा हामी सबैले गर्व गर्नुपर्छ,” उनले भने।
उनका अनुसार महानगरको नेतृत्व कांग्रेसले गरे पनि उपलब्धि नागरिकको सहयोग र सहभागिताका कारण सम्भव भएको हो। उनले काठमाडौँ महानगरको उदाहरण दिँदै सुशासन, पारदर्शिता र वित्तीय अनुशासन कायम गर्न नसक्दा पछाडि परेको टिप्पणी गरे।
हुलाकी सडक निर्माणमा पहल
जामुनगाछी हुँदै सुनसरीतर्फ जोडिने हुलाकी सडक निर्माणमा भएको ढिलासुस्तीबारे स्थानीयको असन्तुष्टि स्वाभाविक रहेको स्वीकार गर्दै उनले समस्या समाधानमा कांग्रेसले सक्रिय भूमिका खेलेको बताए।
उनका अनुसार राज्यले समयमै भुक्तानी नगर्दा ठेकेदार सम्पर्कविहीन भएको थियो। “ठेकेदारलाई खोजी गरेर काम अघि बढाइएको हो। यो सडक सम्पन्न गराउन राज्य संरचना नै परिचालन गर्नुपरेको थियो,” उनले स्पष्ट पारे।
उनले हुलाकी सडक क्षेत्रीय विकास, व्यापार विस्तार र आवागमन सहजताका लागि अत्यन्त महत्वपूर्ण परियोजना भएको बताए।
डुबान समस्या र तटबन्ध प्राथमिकता
विराटनगरको पश्चिमी क्षेत्रका वडा नं. ४, ५, ११ र १२ हरेक वर्ष बाढी र डुबानको समस्याबाट प्रभावित हुने उल्लेख गर्दै उनले केशलिया खोला र बुढी खोलामा तटबन्ध निर्माणलाई प्राथमिकतामा राखिएको बताए।
“हरेक वर्ष जनताले सास्ती भोग्नु परेको छ। खोलामा स्थायी तटबन्ध निर्माणका लागि म सक्दो पहल गर्नेछु,” उनले प्रतिबद्धता जनाए।
उनले दीर्घकालीन योजना, संघीय समन्वय र बजेट सुनिश्चितताबाट मात्र समस्याको स्थायी समाधान सम्भव हुने धारणा राखे।
समग्रमा, डा. शेखर कोइरालाले संविधानको रक्षा, संसदीय सर्वोच्चता, सुशासन, विकास निर्माण र स्थानीय समस्याको समाधानलाई आफ्नो चुनावी एजेन्डाको केन्द्रमा राख्दै मतदातासँग समर्थन मागेका छन्। उनले लोकतान्त्रिक प्रणालीलाई सुदृढ बनाउन जिम्मेवार मत प्रयोग गर्न सबैलाई आग्रह गरेका छन्।