भोजराज घिमिरे मंगलबार, साउन १४, २०८२
कटहरी हुलाकी सडक चार वर्षमा १७% मात्र निर्माण: ठेकेदारको धरौटी कटौती गर्दै काम अघि बढाउने निर्णय
मोरङ, साउन १३– कटहरी खण्डअन्तर्गतको हुलाकी राजमार्गको ६ किलोमिटर सडक खण्डमा निर्माण सुरु भएको चार वर्ष बितिसक्दा समेत जम्मा १७ प्रतिशत मात्रै काम सम्पन्न भएको पाइएको छ। निर्माण कार्यको जिम्मा पाएको श्रेष्ठ कन्स्ट्रक्सनले पटक–पटक आश्वासन दिए पनि सडक अलपत्र अवस्थामा रहँदा स्थानीयले बारम्बार सर्वदलीय र सर्वपक्षीय आन्दोलन, धर्ना तथा सडक अवरोधजस्ता कार्यक्रम गरी आवाज उठाउँदै आएका छन्।
२०७८ सालमा सम्झौता भएको यो आयोजना २०८२ जेष्ठ ३० गते म्याद सकिँदासम्म पनि उल्लेख्य प्रगति हुन नसकेकोले अब म्याद थप नगर्ने निर्णय गरिएको छ।
सडक निर्माणमा देखिएको ढिलासुस्ती र जनताको चर्को असन्तोषलाई ध्यानमा राख्दै सोमबार मोरङका प्रमुख जिल्ला अधिकारी इन्द्रदेव यादवको अध्यक्षतामा बसेको बैठकले ठेकेदार कम्पनीको धरौटी कटौती गर्ने निर्णय गरेको छ। साथै, तत्काल जीर्ण सडकलाई ग्राभेल र रोलरमार्फत हिँड्न मिल्ने बनाउन निर्देशन दिइएको छ।
निर्णयप्रति नागरिक समाजका प्रतिनिधि मृत्युन्जय झा सहित सर्वदलीय नागरिक समाजले स्वागत जनाएका छन्। बैठकमा प्रतिनिधिसभा सदस्यहरू, विभिन्न राजनीतिक दलका नेता, नागरिक समाज, हुलाकी सडक पीडित जनता र सरोकारवाला निकायका प्रतिनिधिहरूको उपस्थिति रहेको थियो।
स्थानीय बासिन्दाहरूले भने, “हामी वर्षौंसम्म धूलो र हिलो खाँदै हिंड्न बाध्य भएका छौं। अब काम तुरुन्त अघि बढ्नुपर्छ, नत्र हामी अझ सशक्त आन्दोलनमा जान बाध्य हुनेछौं।”