विराटनगरवासीलाई शुद्ध र पर्याप्त खानेपानी उपलब्ध गराउन परियोजना सञ्चालन गरिएको हो : प्रमुख सन्तोष रौनियारविराटनगर खानेपानी संस्थान, देवकोटा चोकका प्रमुख सन्तोष रौनियारले जापान सरकारको अनुदानमा जाइकाको सहयोगमा सञ्चालन भइरहेको खानेपानी सुधार आयोजनाले विराटनगरको पानी संकट समाधानमा महत्वपूर्ण भूमिका खेल्ने विश्वास व्यक्त गर्नुभयो।

उहाँले भन्नुभयो,
“विराटनगर महानगर क्षेत्रमा जनसंख्या तीव्र गतिमा बढ्दै गएको छ। अहिलेको खानेपानी संरचना जनसंख्याको माग पुरा गर्न असमर्थ बन्दै गएको अवस्थामा स्वच्छ, सुरक्षित र पर्याप्त पानी वितरण गर्न आधुनिक प्रविधियुक्त प्रणाली आवश्यक थियो। यही आवश्यकता अनुसार जापान सरकारको अनुदान सहयोगमा यो आयोजना सुरु गरिएको हो।”

उहाँका अनुसार,
“परियोजना सम्पन्न भएपछि दैनिक २ करोड लिटर पानी उत्पादन हुने र सो पानी विश्व स्वास्थ्य संगठन (WHO) को मापदण्ड अनुसारको गुणस्तरीय हुनेछ। पानीलाई फिल्टर गरी सिधै उपभोक्ताको धारामा पठाइनेछ, जसले गर्दा पानी उमाल्न वा अन्य तरिकाले शुद्ध गर्नुपर्ने झन्झट हट्नेछ।”

खानेपानी वितरणमा हाल देखिएको समस्यालाई उल्लेख गर्दै प्रमुख रौनियारले थप भन्नुभयो,
“हाल सात स्थानका खानेपानी टंकीहरूबाट वितरण भइरहेको पानीले सबै क्षेत्रमा आवश्यकता अनुसार सेवा दिन सकिरहेको छैन। तर, यो आयोजनाले ठूलो मात्रामा पानी उत्पादन गरी वितरण प्रणालीलाई थप सुदृढ बनाउनेछ।”

उहाँले जानकारी दिनुभयो कि आयोजना सम्पन्न भएपछि महानगरका १६ वटा वडामा नयाँ पाइपलाइन विस्तार हुने र एक लाखभन्दा बढी जनसंख्या प्रत्यक्ष लाभान्वित हुनेछन्।

उहाँले जनतामा अपेक्षा बढेको उल्लेख गर्दै भन्नुभयो,
“यस परियोजनाबाट विराटनगरवासी दीर्घकालीन रूपमा लाभान्वित हुनेछन्। शुद्ध, सुरक्षित र पर्याप्त पानी वितरण प्रणाली विकास हुनु हाम्रो प्रमुख उद्देश्य हो र यसतर्फ काम तीव्र गतिमा अगाडि बढिरहेको छ।”

अन्त्यमा प्रमुख रौनियारले कामको प्रगति सन्तोषजनक रहेको बताउँदै विश्वास व्यक्त गर्नुभयो,
“हालसम्मको प्रगति हेर्दा आयोजनाको काम तोकिएको समयभित्रै सम्पन्न हुनेछ भन्ने विश्वास लिएको छु।”