डुमरलाल मेहता बुधबार, मंसिर १९, २०८१
विराटनगर । मोरङ जिल्लाको ग्रामथान गाउँपालिकाका नव निर्वाचित अध्यक्ष नमोनारायण माझीले पदभार ग्रहण गरेपछि पालिकाका सम्पूर्ण नागरिकका लागि निःशुल्क एम्बुलेन्स सेवा उपलब्ध गराउने पहिलो निर्णय गरेका छन्।
बुधबार गाउँपालिकाको प्राङ्गणमा आयोजित शपथग्रहण कार्यक्रम पछि पदभार ग्रहण गर्दै अध्यक्ष माझीले आकस्मिक स्वास्थ्य सेवाका लागि एम्बुलेन्स सेवा पूर्ण रूपमा निःशुल्क बनाउने निर्णय गरेको बताउनुभयो ।
पालिकाका प्रमुख प्रशासकीय अधिकृत रामराज पौडेलले निर्णयको व्यहोरा सुनाउँदै, “गाउँपालिका भित्रका जुनसुकै स्थानमा दुर्घटना वा अन्य कुनै आकस्मिक अवस्थाका लागि अब कुनै पनि नागरिकले एम्बुलेन्स सेवा लिन शुल्क तिर्नु पर्ने छैन,” जानकारी दिनुभयो।
शपथग्रहण कार्यक्रम मोरङ जिल्ला न्यायाधीश उद्धव भट्टराईले अध्यक्ष माझीलाई पद तथा गोपनीयताको शपथ ग्रहण गराएको थियो। कार्यक्रममा पूर्वमन्त्री तथा संघीय सांसद अमनलाल मोदी, कोशी प्रदेशका सांसद जयप्रकाश चौधरी, पूर्वमन्त्री विजय विश्वास, पूर्व प्रदेशसभा सांसद कुलप्रसाद साम्बा लगायत विशिष्ट व्यक्तिहरूको उपस्थिति थियो।
पदभार ग्रहण गर्दै अध्यक्ष माझीले जनताको आवश्यकता र आकांक्षालाई प्राथमिकतामा राख्दै काम गर्ने प्रतिबद्धता व्यक्त गर्नुभयो। उहाँले पालिकालाई नागरिकमैत्री बनाउने र जनताका गुनासा तथा समस्याहरू पालिकाको सहकार्यबाट समाधान गरिने बताउनुभयो ।
यो निर्णयले ग्रामथान गाउँपालिकाका नागरिकलाई आकस्मिक स्वास्थ्य सेवामा ठूलो राहत प्रदान गर्ने अपेक्षा गरिएको छ।