भोजराज घिमिरे आइतबार, मंसिर १५, २०८२
विराटनगरमा आधुनिक प्राइम अस्पतालको सेवा सुरु
विराटनगर महानगरपालिका–७, अस्पताल चौकमा अत्याधुनिक संरचना र आधुनिक स्वास्थ्य पूर्वाधारसहित निर्माण गरिएको प्राइम अस्पताल आइतबारदेखि औपचारिक रूपमा सेवा सञ्चालनमा आएको छ।
स्वास्थ्य क्षेत्रमा २८ वर्षको अनुभव बोकेका युवा उद्यमी सनातन मण्डलको अगुवाईमा २५ बेड क्षमताको यो अस्पताल पूर्व गोल्डेन अस्पताल रहेको भवनमै पुनः निर्माण तथा प्रविधिक सुदृढीकरण गर्दै सुरु गरिएको हो।
आइतबार सम्पन्न उद्घाटन समारोहमा अस्पतालका सञ्चालक, कार्यरत चिकित्सक तथा चिकित्सकका आमा हरु र अभिभावकले संयुक्त रूपमा रिबन काटेर उद्घाटन गरे। उद्योगी–व्यवसायी नरेश राठी, नेपाल अग्रवाल सभा विराटनगरका अध्यक्ष राजकुमार अग्रवाल लगायत ठूलो संख्यामा उद्योगी–व्यवसायीको सहभागिता थियो। प्राइम अस्पतालका सञ्चालक समितिका अध्यक्ष डा. रमेश चौरसिया रहेका छन्। अन्य सञ्चालकहरूमा
– डा. रंजिव यादव
– डा. अजय महतो
– डा. मनिष अग्रवाल
– डा. टेकनारायण यादव
– सनातन मण्डल
समावेश छन्।
अस्पतालले एकैपटक १५ जना दक्ष विशेषज्ञ चिकित्सकसहित सेवा सुरु गरेको जनाएको छ।
अस्पतालका अनुसार भवन तथा पूर्वाधार निर्माणमा ८ करोड र अत्याधुनिक मेसिन तथा उपकरण खरिदमा ३ करोड खर्च भई कुल लगानी ११ करोड रुपैयाँ पुगेको छ।
– बिरामीलाई पूर्ण स्वस्थ भएपछि मात्र घर पठाउने लक्ष्य
– ४ कठ्ठा क्षेत्रफलमा तीनवटा छुट्टाछुट्टै पार्किङ
– अन्य अस्पतालभन्दा कम शुल्कमा सेवा दिने प्रतिवद्धता
– प्रारम्भिक चरणमै १५ दिनसम्म उपचारमा ५०% छुट
सञ्चालक मण्डलका अगुवा सनातन मण्डलका अनुसार, “अन्य अस्पतालभन्दा दुई रुपैयाँ भए पनि प्राइम अस्पतालमा उपचार सस्तो हुनेछ। गुणस्तरीय र भरपर्दो सेवा नै हाम्रो मुख्य उद्देश्य हो।”
हाल ७० जनाले प्रत्यक्ष रोजगारी पाएका छन्। अस्पताल विस्तारसँगै ३५० जनासम्म प्रत्यक्ष रोजगारी सिर्जना हुने अस्पतालले जनाएको छ।
स्थानीयवासीलाई सहज, किफायती र आधुनिक स्वास्थ्य सेवा प्रदान गर्ने लक्ष्यसहित सुरु गरिएको प्राइम अस्पताल विराटनगरको स्वास्थ्य क्षेत्रमा महत्वपूर्ण योगदान पुर्याउने अपेक्षा गरिएको छ।
