भोजराज घिमिरे शुक्रबार, कार्तिक २२, २०८२
ऊर्जा दक्षता सुधारका लागि उद्योग र बैंकबीच सहकार्य आवश्यक — जिआइजेड
निजी क्षेत्र र वित्तीय संस्थाको साझेदारीबाट मात्र ऊर्जा दक्षता क्षेत्रमा दीर्घकालीन सुधार सम्भव : डा. गोर्खाली
विराटनगर। नेपालमा ऊर्जा दक्षता सुधारका लागि प्रभावकारी वित्तीय संयन्त्रको आवश्यकता रहेको बताउँदै जर्मन विकास सहयोग संस्था जि.आई.जेड (GIZ) का कार्यक्रम व्यवस्थापक डा. संजय गोर्खालीले निजी क्षेत्र र बैंकबीचको सहकार्य सुदृढ पार्न जि.आई.जेडले नीति तथा प्राविधिक सहयोग गर्दै आएको जानकारी दिएका छन्।
मोरङ उद्योग संगठनमा आयोजित छलफल कार्यक्रममा उनले ऊर्जा दक्षता अभिवृद्धिका लागि वित्तीय पहुँच र संयन्त्र विकासलाई अत्यावश्यक रहेको उल्लेख गर्दै, “निजी क्षेत्र र बैंकहरूको सहकार्यले मात्र यस क्षेत्रमा दीर्घकालीन सुधार सम्भव छ,” भने।
कार्यक्रममा संगठनका उपाध्यक्ष सुरेन्द्र गोल्छा, विपिन कावरा र सुवोध कोईरालाले ऊर्जा दक्षता सम्बन्धी परियोजनाहरूमा लगानी प्रोत्साहन गर्न तथा नीति र क्षमता विकासका कार्यक्रमलाई प्राथमिकतामा राख्नुपर्ने धारणा राखे।
त्यस्तै, उर्जा समिति संयोजक सन्तोष भगत र कार्यसमिति सदस्य सृजन प्याकुरेलले उद्योग प्रतिष्ठानहरूमा व्यवहारिक वित्तीय संयन्त्र तयार गरी ऊर्जा दक्षता प्रवर्द्धनका कार्य अघि बढाउनुपर्नेमा जोड दिए।
छलफल कार्यक्रममा विभिन्न उद्योग प्रतिष्ठानका सञ्चालक, वित्तीय संस्थाका प्रतिनिधि तथा चार्टर्ड एकाउन्टेन्टहरूको सक्रिय सहभागिता रहेको थियो।
कार्यक्रममा नेपाल बैंकर्स एशोसिएशन, जि.आई.जेड नेपाल र मोरङ उद्योग संगठनको संयुक्त आयोजनामा उद्योग क्षेत्रले ऊर्जा दक्षता अभिवृद्धि गर्न आवश्यक संरचनागत परिवर्तनका क्रममा लाग्ने वित्तीय स्रोत र प्रक्रिया सम्बन्धी विषयमा विस्तृत छलफल गरिएको थियो।
संगठनका अध्यक्ष नन्दकिशोर राठीले ऊर्जा दक्षता केवल उर्जा बचत र वातावरणीय दायित्वको विषय मात्र नभई उद्योग व्यवसायको दीर्घकालीन स्थायित्वसँग प्रत्यक्ष सम्बन्धित विषय भएको बताउँदै निजी क्षेत्र र वित्तीय संस्थाले संयुक्त रूपमा काम गरे यस क्षेत्रमा उल्लेखनीय प्रगति सम्भव हुने धारणा राखे।