Radio Nagarik 100.4 MHz शनिबार, कार्तिक २२, २०८३
बाजुरा, कात्तिक २१ गते । बाजुराको मार्तडी–कोल्टी सडक निर्माण कार्य सुस्त गतिमा छ । २०७६ सालदेखि निर्माणको काम सुरु गरिएको सो सडक अहिले आठ वर्ष हुँदासम्म पनि अझै काम सम्पन्न हुन सकेको छैन ।
निर्माणको जिम्मा लिएको कम्पनीको लापरवाहीका कारण सडक निर्माणमा ढिलाई भएपछि अहिले जिल्लाको पूर्वी उत्तर क्षेत्रका स्थानीयवासीलाई कोल्टीदेखि मार्तडी आउजाउ गर्न निकै सास्ती खेप्दै आउनु परेको छ ।
२०७८ साल असार मसान्तभित्र काम सम्पन्न गर्ने गरी २०७६ असारमा धुलिखेल ग्वाल्भा श्याम एन्ड शङकर प्रालि काठमाडौँ, बानियाँ कोटेश्वर जेभी प्रालि हेटौँडा र पिएस बानियाँ जेभीले सडक निर्माण कार्यको जिम्मा लिएका थिए ।
मार्तडीको बसपार्कदेखि चुथीसम्मको झण्डै ९ किलोमिटर सडक कालोपत्रेका लागि २३ करोडमा धुलिखेल ग्वाल्भा श्याम एण्ड शङ्कर प्रालि काठमाडौं र चुथीदेखि ढम्कनेको करिब ६ किलोमिटर र ढम्केनेदेखि कोल्टीसम्मको २६ किलोमिटर सडक बाँनिया कोटेश्वर जेबि प्रालि हेटौडाले ६२ करोडमा जिम्मा लिएका हुन् ।
यता मार्तडीदेखि चुथीसम्मको ९ किलोमिटर सडक पक्की गर्ने काम सम्पन्न भएपनि उता ढम्कनेदेखि कोल्टीसम्मको ३१ किलोमिटर सडकमा भने अझै काम हुन सकेको छैन ।
मार्तडीदेखि कोल्टीसम्मको ४२ किलोमिटर सडक कालोपत्रे गर्न ८५ करोडमा ठेक्का लिने ती दुई कम्पनीले ३५ करोडभन्दा बढी पहिलो किस्ता रकम भुक्तानी लिइसकेको भौतिक पुर्वाधार विकास कार्यालय अछामले जनाएको छ ।
लामो समयदेखि सडक निर्माण नहुँदा जिल्लामा उत्पादन भएका स्याउ सुन्तला कागती लगायतका फलफुल तथा तरकारी समयमै बजारसम्म लान समेत समस्या हुने गरेकोे बुढीनन्दा नगरपालिका स्थानीय रामबहादुर रोकायाले बताउनुभयो ।
यता लामो समयदेखि काम रोकिएको सो कम्पनीले यति बेला फेरि काम सुरु गर्नेगरी अहिले मेसिन मर्मत कार्य भइरहेको जनाएको छ ।
मार्तडी –कोल्टी सडक निर्माण कार्यको जिम्मा लिएको बाँनिया कोटेश्वर जेबि प्रालि हेटौडाले अहिले फेरि आफैले सडक निर्माणको काम सुरु गरेको भौतिक पर्वाधार विकास कार्यालय अछामका प्रमुख जङ्बहादुर थापाले बताउनुभयो ।
उहाँले भन्नुभयो, “ हामीले पनि यो वर्षको कात्तिकदेखि माघसम्ममा काम गर्छ या गर्दैन प्रतिाक्षा गर्छौ । यदी त्यो समयमा पनि उसले काम गर्न सकेन भने त्यसपछि हामी उसको ठेक्का तोड्ने तयारीमा छौ । ”
अहिले पनि एक महिना अघि नै उसबाट १८ करोड पेश्कीसमेत फिर्ता लिएर सो रकम राजस्व खातामा जम्मा गरिसकेको प्रमुख थापाले बताउनुभयो ।