विराटनगर । विराटनगर जुनियर जेसीजको आयोजनामा सम्पन्न अन्तरविद्यालय वक्तृत्वकला प्रतियोगितामा विराटनगरस्थित एभरेस्ट सेकेण्डरी स्कुलका विद्यार्थी एरिन जङ्ग थापा प्रथम भएका छन्।
विद्यार्थीमा वक्तृत्वकला, नेतृत्व क्षमता तथा सिर्जनात्मक अभिव्यक्तिको विकास गर्ने उद्देश्यले आयोजना गरिएको प्रतियोगितामा विराटनगरका विभिन्न १५ विद्यालयका विद्यार्थीले सहभागिता जनाएका थिए।
‘सहभागी बनौँ, रूपान्तरण हुँदै अगाडि बढौँ, उत्कृष्टता हासिल गरौँ’ भन्ने विषयमा आयोजित प्रतियोगितामा सहभागी विद्यार्थीहरूले विषयवस्तुमाथि आफ्ना धारणा, विचार तथा दृष्टिकोण प्रस्तुत गरेका थिए। विद्यार्थीहरूले सामाजिक रूपान्तरण, सहभागिता, नेतृत्व र उत्कृष्टताका विषयलाई केन्द्रमा राख्दै आफ्ना विचार प्रस्तुत गरेका थिए।
प्रतियोगितामा एभरेस्ट सेकेण्डरी स्कुलका एरिन जङ्ग थापाले उत्कृष्ट प्रस्तुति दिँदै प्रथम स्थान हासिल गरे। पोलस्टार स्कुलकी प्रकृति घिमिरे द्वितीय र बीकेभीएम स्कुलका जोसेफ महतो तृतीय भएका छन्।
प्रतियोगितामा प्रथम हुने एरिन जङ्ग थापालाई पाँच हजार रुपैयाँ नगद पुरस्कारसहित प्रमाणपत्र, ट्रफी र मेडल प्रदान गरिएको थियो। त्यसैगरी द्वितीय हुने प्रकृति घिमिरेलाई तीन हजार तथा तृतीय हुने जोसेफ महतोलाई दुई हजार रुपैयाँ नगद पुरस्कारसहित प्रमाणपत्र, ट्रफी र मेडल प्रदान गरिएको आयोजकले जनाएको छ।
विराटनगर जुनियर जेसीजका अध्यक्ष ओम जोगीको अध्यक्षतामा प्रतियोगिता सम्पन्न भएको थियो। कार्यक्रममा विराटनगर प्रज्ञा प्रतिष्ठानका अध्यक्ष तथा पूर्वाञ्चल साहित्य प्रतिष्ठानका अध्यक्ष विवस पोखरेल प्रमुख अतिथिका रूपमा सहभागी थिए।
कार्यक्रममा साहित्य, शिक्षा तथा विद्यार्थीको व्यक्तित्व विकासमा यस्ता प्रतियोगिताले महत्वपूर्ण भूमिका खेल्ने धारणा व्यक्त गरिएको थियो। विद्यार्थीलाई आफ्ना विचार स्पष्ट, तार्किक र प्रभावकारी ढङ्गले प्रस्तुत गर्न सक्षम बनाउनुका साथै नेतृत्व विकासमा समेत वक्तृत्वकला प्रतियोगिताले सहयोग पुर्‍याउने बताइएको थियो।
प्रतियोगिताको निर्णायक मण्डलमा लेखक तथा कवि सीमा आभास, प्राध्यापक अनुज शर्मा र विराटनगर जुनियर जेसीजका पूर्वअध्यक्ष देवेश प्रधान रहेका थिए। निर्णायकहरूले विद्यार्थीको विषयवस्तुको ज्ञान, प्रस्तुतीकरण शैली, भाषाशैली, तर्क, आत्मविश्वास तथा समय व्यवस्थापनलगायतका आधारमा मूल्याङ्कन गरेका थिए।
विराटनगर जुनियर जेसीजले विद्यार्थीको क्षमता र प्रतिभा उजागर गर्ने उद्देश्यले विभिन्न सिर्जनात्मक तथा नेतृत्व विकाससम्बन्धी कार्यक्रम गर्दै आएको जनाएको छ। वक्तृत्वकला प्रतियोगिताले विद्यार्थीलाई आफ्नो प्रतिभा प्रस्तुत गर्ने अवसर प्रदान गर्नुका साथै प्रतिस्पर्धात्मक वातावरणमा सिक्ने र आत्मविश्वास बढाउने अवसरसमेत दिएको आयोजकको भनाइ छ।
प्रतियोगितामा सहभागी विद्यार्थीहरूले आफूले अध्ययन गरेका विषय र समसामयिक सामाजिक विषयमा आफ्ना धारणा प्रस्तुत गरेका थिए। विद्यालय तहदेखि नै विद्यार्थीलाई सार्वजनिक रूपमा आफ्ना विचार राख्न अभ्यस्त गराउने यस्ता कार्यक्रमले उनीहरूको व्यक्तित्व विकासमा सहयोग पुग्ने सहभागी विद्यालयका प्रतिनिधिहरूले बताएका छन्।
प्रतियोगितामा प्रथम स्थान हासिल गरेका एरिन जङ्ग थापालाई आयोजक तथा सहभागी विद्यालयका प्रतिनिधिले बधाई दिँदै आगामी दिनमा पनि आफ्नो प्रतिभालाई थप निखार्दै अघि बढ्न शुभकामना दिएका थिए।