विराटनगर । सुनसरीको देवानगञ्ज गाउँपालिकाले वडा नम्बर ५ अवस्थित अमर सिंह माध्यमिक विद्यालयलाई सोमबार एक औपचारिक कार्यक्रमका बीच नयाँ ५१ सिट क्षमताको स्कुल बस हस्तान्तरण गरेको छ।
गाउँपालिकाका अध्यक्ष बेचन प्रसाद मेहताले सो बस विद्यालयका प्रधानाध्यापक ईन्द्रदेव गुप्तालाई हस्तान्तरण गरेका हुन्। कार्यक्रममा उपाध्यक्ष कुमारी विभा यादव, वडा नं. ५ का अध्यक्ष मनोज मण्डल, वडा सदस्य प्रमानन्द पाल, समाजसेवी अशोक बहरदार, विद्यालयका शिक्षक, अभिभावक तथा विद्यार्थीहरूको उपस्थिति रहेको थियो।
कार्यक्रममा बोल्दै अध्यक्ष मेहताले विद्यालयमा शैक्षिक गुणस्तर अभिवृद्धिका लागि पालिकाले विविध कार्यक्रमहरु सञ्चालन गरिरहेको उल्लेख गरे। साथै, स्कुल बस सञ्चालनमा आएपछि टाढाबाट विद्यालय आउन–जान कठिन हुने विद्यार्थीहरूलाई सहज हुने र विद्यार्थीहरूको संख्या समेत वृद्धि हुने विश्वास व्यक्त गरे।
विद्यालयका लागि यो बस सुविधा स्थानीय तहको प्रयास र समुदायको सहकार्यको सफल उदाहरणका रूपमा लिइएको छ।