विराटनगर । आदर्श माध्यमिक विद्यालय विराटनगर ७ मोरङले शैक्षिक सत्र २०८२ का लागि प्रवेश परीक्षा लिएको छ। प्रवेश परीक्षामा कक्षा ४ देखि कक्षा ९ सम्म २४० जना विद्यार्थीका लागि लिएको प्रवेश परीक्षामा १७६४ जना विद्यार्थीहरू परीक्षामा सहभागी भएका छन् ।

कक्षा ४ देखि कक्षा ९ सम्मका लागि प्रत्येक कक्षामा ४० जनाका लागि लिएको भर्ना परीक्षामा कक्षा ४ मा १२४ कक्षा पाँचमा १९२ कक्षा ६ मा २८० कक्षा ७ मा ३३४ कक्षा ८ मा ४२० कक्षा ९ मा ४१४ गरी जम्मा १७६४ जना विद्यार्थीहरू परीक्षामा सहभागी भएका छन् । पछिल्लो समय आदर्श माध्यमिक विद्यालयमा भएको शैक्षिक सुधारका कार्यक्रमको प्रभावका कारण विद्यालयको आकर्षण दिनप्रतिदिन बढ्दै गइरहेको छ । कक्षा बालविकासदेखि कक्षा १२ सम्म अङ्ग्रेजी र नेपाली माध्यममा पढाइ हुँदै आएको यस विद्यालयमा प्राविधिक धारका डिप्लोमाका कक्षाहरू तथा समावेशी शिक्षाका रूपमा अपाङ्गता भएका बालबालिकाहरूका लागि सिकाई वातावरण पनि सुरु गरिएको छ। देशकै पुरानो विद्यालयको नाममा छवि बनाएको यस विद्यालयले पछिल्लो समय आफूलाई देशभरिका विद्यालय मध्ये उत्कृष्ट विद्यालयको रूपमा स्थापित गरेको छ। यस विद्यालयमा धेरै अभिभावकका बालबालिकाहरूले पढ्न चाहेको भएतापनि विद्यालयको पूर्वाधारका अभावको कारणले विद्यालयले सबै विद्यार्थीहरूलाई भर्नालीएर शिक्षण सिकाई गर्न सकेको छैन। विद्यालयले आफ्नो सेवा क्षेत्रभित्रका आधारभूत तहका विद्यार्थी हरू र बाल विकास केन्द्रका विद्यार्थीहरूलाई भने प्रवेश परीक्षा बिना नै भर्ना लिने गरेको छ।