विराटनगर । क्यान महासंघ मोरङले ओएसिस क्याफे, विराटनगरमा आज विशेष कार्यक्रम आयोजना गरी आफ्नो नयाँ कार्यसमितिलाई परिचयात्मक तथा सदस्यता प्रमाणपत्र वितरण समारोह भव्यरूपमा सम्पन्न गरेको छ।
कार्यक्रमको उद्घाटन साना बालिका निहारिका यादवले गमलामा पानी हालेर गरेकी थिइन्। यसले भविष्यका कर्णधार बालबालिकालाई प्रकृति र प्रविधिको महत्वबारे सचेत तुल्याउन र उनीहरूलाई नेतृत्वको जिम्मेवारी सिकाउन विशेष प्रेरणा दिएको आयोजकले बतायो।

मोरङ बार एसोसिएसनका उपाध्यक्ष नवराज दाहालको निर्वाचन अधिकृतत्वमा नयाँ कार्यसमिति चयन गरिसकिएको थियो। कार्यक्रममा दाहालद्वारा कार्यसमिति सदस्यहरूलाई प्रमाणपत्र वितरण गरियो। उनले क्यान महासंघ मोरङले सौहार्दपूर्ण वातावरणमा निरन्तर भिन्न शैलीका कार्यक्रम गर्दै आएकोमा प्रशंसा गर्दै संस्थाको भविष्यप्रति आशा व्यक्त गरे।
क्यान महासंघ मोरङका उपाध्यक्ष सौरभ गोल्छाका अनुसार सदस्यता प्रमाणपत्र र कार्ड वितरणले व्यवसायप्रति ग्राहकहरूको विश्वास बढाउनेछ। “प्रमाणपत्रले व्यवसायिक संस्थाको आधिकारिकता पुष्टि गर्दै यस क्षेत्रका कम्प्युटर व्यवसायीहरूलाई सशक्त बनाउनेछ,” उनले भने।
कार्यक्रममा संस्थाका विभिन्न पदाधिकारीहरूले आगामी योजनाबारे जानकारी गराए। न्यानोटेक आईटी सोलुसनका प्रवन्धक सुमितकुमार साहले व्यवसायीहरूलाई एकीकृत गरी “बी.टु.बी. नेटवर्किङ”, “क्यान इन्फोटेक” जस्ता कार्यक्रम र छात्रवृत्ति कोष सञ्चालन गर्ने योजना रहेको बताए।
सहसचिव नवीन यादवले संस्थाको भिन्न शैली र प्रविधिको उपयोगलाई विशेष प्राथमिकता दिने बताए। कार्यक्रममा संस्थाले “फूलको विरुवा” मायाको चिनोस्वरूप वितरण गर्दै प्रकृतिप्रति उत्तरदायित्वको सन्देश दिएको थियो।
क्यान महासंघ मोरङले आफ्ना गतिविधिहरूलाई थप प्रविधिमैत्री बनाउन आजकै दिन आफ्नै वेब पोर्टल सार्वजनिक गरेको छ। “वेब पोर्टलमार्फत संस्थाका सम्पूर्ण https://canmorang.org.np  गतिविधिहरूलाई सबैले सहजै जानकारी लिन सक्नेछन्,” सचिव अजित चापागाईंले बताए।
कार्यक्रम भव्य, सभ्य, र प्रेरणादायी ढंगले सम्पन्न भएको महसुस आयोजकहरूले गरेका छन्। प्रविधि र सामाजिक उत्तरदायित्वलाई सँगै लिएर अघि बढ्ने क्यान महासंघ मोरङको यो प्रयासले व्यवसायिक वातावरणलाई थप बलियो बनाउने विश्वास गरिएको छ।