Radio Nagarik 100.4 MHz बुधबार, आश्विन २८, २०८३
गत आव १ खर्ब ६१ अर्ब ४६ करोड रुपैयाँमात्र वैदेशिक सहायता प्रतिबद्धता प्राप्त भएको छ ।
२८ असोज, काठमाडौं । गत आर्थिक वर्ष २०८२/८३ मा वैदेशिक सहायता प्रतिबद्धतामा ४१ प्रतिशतको गिरावट आएको देखिएको छ ।
अर्थ मन्त्रालयले सार्वजनिक गरेको वार्षिक अर्थ बुलेटिन अनुसार यस आवमा १ खर्ब ६१ अर्ब ४६ करोड रुपैयाँमात्र वैदेशिक सहायता प्रतिबद्धता प्राप्त भएको छ । आव २०८१/८२ मा २ खर्ब ७३ अर्ब ५ करोड बराबर प्रतिबद्धता आएको थियो ।
गत आव यस्तो प्रतिबद्धता ४०.९ प्रतिशत घटेको हो । कुल वैदेशिक सहायता प्रतिबद्धतामध्ये बहुपक्षीय साझेदारको हिस्सा ६३.६ प्रतिशत र द्विपक्षीय साझेदार (मुलुक) को हिस्सा ३६.४ प्रतिशत छ ।
गत आव सहायता प्राप्तिसमेत लक्ष्यको तुलनामा कम भएको छ । एक वर्षमा सरकारले अनुदानतर्फ ३२ अर्ब ८४ करोड र ऋणतर्फ १ खर्ब १६ अर्ब ४४ करोडमात्र प्राप्त गरेको छ । जुन अघिल्लो आवको तुलनामा ४.७ प्रतिशत कम हो ।